زَبورئے پنچمی کتاب
زَبور 107—150
هُداوندئے مِهر اَبدمان اِنت
107
هُداوندئے شُگرا بگرێتکه نێک اِنت و مِهری اَبدمان.
2 هُداوندئے رَکّێنتگێن هبر بکناتنت،
هما که چه دژمنانی دستا رَکّێنتگاَنتی،
3 هما که چه بازێن سرڈگاران زرتگ و یکجاهی کرتگاَنت،
چه شَگرب و مَگرب، چه شمال و جنوبا.
4 لهتێن، جنگل و گیابانان سرگردان بوت و
په چُشێن شهرێا راهے ندیستِش که جَهمنند ببنت.
5 گژنگ و تُنّیگ منتنت،
مَرکیگ بوتنت.
6 نون سکّیانی تها هُداوندئے گوَرا پریاتِش کرت و
آییا چه سکّیان رَکّێنتنت.
7 آییا چه تچکێن راهێا رهشۆنی کرتنت،
دێم په شهرێا که اۆدا جَهمنند ببنت.
8 هُداوندئے شُگرا بگراتنت، آییئے مِهر و
په بنیآدما آییئے باکَمالێن کارانی سئوَبا.
9 هما اِنت که تُنّیگان سێراپَ کنت و
گُژنگان چه شرّێن وراکا سێرلاپ.
10 تهارترێن تهاریان نِشتگاَتنت،
آسنێن زمزیلانی بندیگ و اَزاب اَتنت
11 که هُدائے هبرانی هلاپا سرکشیاِش کرتگاَت و
بُرزێن اَرشئے هُدائے سر و سۆجِش کَلاگ بستگاَتنت.
12 گڑا زهمتکَشّیئے سرا دات و آیانی گروری پرۆشت،
ٹگلِش وارت و مَدَت کنۆکِش نێستاَت.
13 نون سکّی و سۆریانی تها گۆن هُداوندا پریاتِش کرت و
آییا چه جنجالان رَکّێنتنت.
14 چه تهارترێن تهاریان دری کرتنت و
آیانی زمزیلی پرۆشتنت.
15 هُداوندئے شُگرا بگراتنت،
آییئے مِهر و
په بنیآدما آییئے باکَمالێن کارانی سئوَبا
16 که بْرنجێن دروازگی پرۆشتنت و
آسنێن بندی گُڈِّتنت.
17 چه وتی سرکَشیا اَهمک بوتنت و
وتی گناهانی سئوَبا سکّی و سۆریان کپتنت.
18 وراکِش گُٹّا اێرَ نشُت و
مرکئے دروازگا رَستنت.
19 نون سکّی و سۆریانی تها گۆن هُداوندا پریاتِش کرت و
آییا چه جنجالان رَکّێنتنت.
20 وتی هُکمی راه دات و دراهی کرتنت و
چه کَلّ و کَڈّا رَکّێنتنتی.
21 هُداوندئے شُگرا بگراتنت، آییئے مِهر و
په بنیآدما آییئے باکَمالێن کارانی سئوَبا.
22 شُگرگزاریئے کُربانیگ بکناتنت و
گۆن شادمانیئے سئوتان آییئے کارانی کسّها بیاراتنت.
23 هما که گۆن بۆجیگان دریایا شتنت،
هما که آپانی سرا سئوداگریاِش کرت،
24 هُداوندئے کارِش دیستنت،
مان جُهلانکیان آییئے هئیران کنۆکێن کار.
25 آییا هبر کرت و توپّانێن گْواتے آتک و
دریائے چئولی چِست کرتنت.
26 بۆجیگ بُرزاد تان اَرشا شتنت و
جهلاد تان جُهلانکیان کپتنت و
چه جنجالا آیانی اَرواه آپ بوت.
27 شرابیانی پئیما تَتّرگ و ٹگل ورگا لگّتنت و
آیانی سجّهێن اِزم و هنر گار بوت.
28 نون سکّی و سۆریانی تها گۆن هُداوندا پریاتِش کرت و
آییا چه جنجالان رَکّێنتنت.
29 توپّانی اێرمۆش کرت و
دریائے چئول نِشتنت.
30 توپّان که اێر نِشت، گَل بوتنت،
دێم په هما تئیابا رهشۆنیای کرتنت که وت رئوَگِش لۆٹت.
31 هُداوندئے شُگرا بگراتنت، آییئے مِهر و
په بنیآدما آییئے باکَمالێن کارانی سئوَبا.
32 مردمانی مُچّیا آییا ستا بکناتنت و
کماشانی مجلسا تئوسیپ.
33 آ کئوران گیابانَ کنت،
تچۆکێن چمّگان، هشکاوگێن زمین و
34 کِشت و کِشاری زمینان سۆرگَ* کنت،
اۆدئے جَهمنندانی بدکاریئے سئوَبا.
35 گیابانان گوَرمَ* کنت و
هُشکێن زمینان، تچۆکێن چمّگ.
36 شدیگی آورت و همۆدا جَهمنند کرتنت و
آیان شهرے آباد کرت و نِشتنت.
37 آیان ڈگار کِشت و انگوری باگ آباد کرت
که باز بَر و سَمرِش دات.
38 آییا برکت داتنت و آ سکّ باز گێشتر بوتنت،
نهاِشتی که دَلوَتِش کمّ ببنت.
39 نون آ کمّ تَرّان و وار و زار بوتنت،
چه آزار و جنجال و گَما.
40 هما که شَرپداران بێشَرپَ کنت،
آیی زرت و بێراهێن گیابانان دَرپَدَر کرتنت.
41 بله هاجتمندی چه سَکّیان در کرتنت،
آیانی کَهۆلی* رمگانی پئیما باز کرتنت.
42 نێکدِلِشَ گِندنت و شادمانیَ کننت و
هر بدکار وتی دپا بندَ کنت.
43 هرکَس که دانا اِنت، اے کاران بچاریت و
هُداوندئے پُرمِهرێن کارانی سرا شَرّیا پِگر بکنت.